नागपूर : आम्ही शासकीय सेवेत आहोत. यामुळे शासनाच्या आदेशानुसार दिलेली सर्व कामे करण्यास तयार आहोत. परंतु, आम्हाला शासनाच्या निर्देशाची प्रत दाखवण्यात यावी. आम्ही सेवा देण्यास नेहमीच तयार आहोत. परंतु, तोंडी आदेश देऊ नका. सेवा देताना आमच्या जिवाचे बरेवाईट झाल्यास जबाबदार कोण, हा सवाल आहे शासकीय दंत महाविद्यालय व रुग्णालयातील पॅरामेडिकल कर्मचाऱ्यांचा. 

शासकीय दंत महाविद्यालय व रुग्णालयातील सहायक प्राध्यापकांपासून तर निवासी डॉक्‍टरांनी संशयितांचे नमुने घेण्याच्या कार्यात मदत करावी, असे आदेश शासनाकडून देण्यात आले. या आदेशात शासकीय दंत

महाविद्यालयातील आरोग्य तंत्रज्ञांच्या कार्याबाबत कोणतेही आदेश नाहीत. मात्र, शासकीय दंत महाविद्यालय व रुग्णालयात इमाने इतबारे येत असून आवश्‍यक कामे करीत आहेत. शासनाच्या आदेशानुसार दंत चिकित्सकांनी काम करण्यास सुरुवात केली आहे. विभागीय आयुक्तांच्या पत्राचा संदर्भ घेत शासकीय दंत महाविद्यालयाचे अधिष्ठाता यांनी स्वतःच्या स्वाक्षरीनुसार तृतीय व चतुर्थ श्रेणी कर्मचाऱ्यांनाही सहायक प्राध्यापक आणि निवासी डॉक्‍टरांना येथील दंत आरोग्यतज्ज्ञांनी सहकार्य करावे, असे आदेश काढले. यामुळे दंत आरोग्यतज्ज्ञांमध्ये प्रचंड असंतोष भडकला आहे. आम्ही काम करण्यास तयार आहोत. परंतु, शासनाचे तसे आदेश हवे आहेत, अशी भूमिका आरोग्यतज्ज्ञांनी घेतली आहे. यासंदर्भात दंतचे अधिष्ठाता डॉ. मंगेश फडनाईक यांच्याशी संपर्क साधला; परंतु संपर्क होऊ शकला नाही. 

हेही वाचा : 42 देशांतील मराठी बांधव करणार कोरोना महाजागर...सहभागासाठी संकेतस्थळाला द्या भेट
 
कोविड-19च्या कामासाठी हजर व्हावे 
शासकीय दंत महाविद्यालय व रुग्णालयातील दंत आरोग्यतज्ज्ञांनी तत्काळ कोविड-19च्या कामासाठी हजर व्हावे, असे अधिष्ठातांनी दिलेल्या आदेशात आहे. वरिष्ठांशी तोंडी चर्चा झाल्यानंतर अधिष्ठातांच्या स्वाक्षरीने हा आदेश काढण्यात आला आहे, अशी प्रशासनाची भूमिका आहे. मात्र, दंत आरोग्यतज्ज्ञांना वरिष्ठांचे लेखी आदेश हवे आहेत. कर्मचाऱ्यांना बरेवाईट झाल्यास जबाबदारी घ्यावी. तसे पत्र द्यावे, असेही तक्रारीत नमूद आहे.